彼女久唔久就會問我「 我同你個 Ex 邊個好啲？」

 

其實彼氏唔明啲女人咁樣問係咩心態。 女人愛比較，男人又何嘗唔係呢？

每次佢一咁問，彼氏就會反思究竟彼女有咩係比唔上個 Ex。

 

早幾年聖誕節，Ex 煮咗成餐聖誕大餐，牛排意粉焗薯樣樣好食。彼女都試過下廚，上次整左個肉餅，賣相有少少似我朋友畀隻狗食嘅狗餅（雖然咁講衰咗啲，不過真係好似），好在上次影帝上身過到骨。

 

有邊個男人唔想同自己女朋友間中 / 經常親熱吓先，同 Ex 嘅性生活就唔多分享喇，總之會間中喺出面過吓夜 Relax 吓咁囉。彼女呢？有時親熱吓想犯吓手球都葉問上身，玩痴手，你係男人你點睇先？

 

唉舊時糧尾冇錢同個 Ex 出街，咪食吓癱仔算數，再唔係就加多碟土豪雞翼。彼女就偏會係糧尾時期扭計要食日本嘢。彼氏其實有時只係想慳返少少錢買多隻 Game 打吓⋯⋯

 

其實真係唔係想諗咁多衰野，但係唔知點解彼女一問到呢個問題，彼氏就忍唔住回味吓 Ex 所做過嘅嘢。當然，以上呢啲回想只係會同兄弟分享，因為彼氏仲有好多錢未搵，未想死住。

 

冇計，拍拖有時就係講感覺，成日要拎實際嘢嚟比較，就真係冇乜意思。因為喺我心目中，雖然彼女唔係最好，但偏偏係彼氏嘅最愛。

 

最後我諗左兩秒，同彼女講「 傻豬， 梗係你最好啦：）」

 

P.S. 以下是彼氏交完呢篇文嘅下場