彼女我可能每個星期(或者每隔幾日)就會有嘢要買/想買,真係無計㗎有時,總有啲嘢係會用完,加上差不多日日打個 Facebook 都見都有新產品推出,搶女人錢就係咁簡單。

 

學生時代無辦法之下有嘢想買唯有死慳死抵,食少餐為咗儲啲零用錢買吓文具(彼女中學係齊哂P牌嘅熒光筆同原子筆嘅所有顏色……);到咗大學,開始自己搵吓錢,知道搵錢係辛苦嘅,所以更加要買嘢獎勵自己啦~係咪先?化妝品同香水就變咗收藏嘅 Target;到咗出嚟做嘢,化妝品買少咗,反而係投資喺衫同護膚品度:返工唔可以再好似大學咁著吓頹 Tee 踢對拖就出門口,而且唔想隔幾日就重覆著返同一套衫,真係無辦法;而護膚品,更加係人越大越要重點課金嘅地方啦!

 

其實彼女一路都唔覺得咁樣洗錢有咩問題,直至識咗彼氏。

 

彼氏同彼女完全相反,除咗食飯搭車,平日基本上係無洗費。衫褲鞋襪每樣有五件左右就話夠,彼女嘅白眼真係反到後腦!不過見到彼氏咁樣,彼女真係有反思吓其實係咪真係咁多樣嘢係「需要」。久而久之,彼女會問准彼氏先買嘢,而且學埋彼氏啲衰嘢,買一樣嘢之前都諗返少則三五七日,多就兩三個月先買。買少咗咁多嘢係有少少心理唔平衡,但係當儲吓錢囉唯有。

 

到真係好想洗錢嘅時候,仲有一招絕招,就係買嘢比彼氏喇!雖然成日話唔駛唔駛,明明收到就好開心:)

 

P.S. 彼女見彼氏有新 Macbook 用咁開心,送咗隻老鼠仔賀吓佢~

【彼女點睇 — 購物之達人】

 

彼女

八月十一日

彼氏 彼女 A Couple of Stories

彼氏 = 男友,彼女 = 女友

這是關於一對情侶的相處逸事

A Couple of Stories:一段經歷,兩種視角

COPYRIGHT 2019 ©ALLGIRLSHK. ALL RIGHTS RESERVED