彼氏係個小毒男,一知道要出街拍拖就會覺得好苦惱。

 

第一,諗唔到出街做咩嘢。講真拍拖咁耐,香港仲有啲咩地方未去過?真係諗唔到。況且彼氏同彼女都是扮工一族,有時放假又冇咁好精力走咁遠,到最後都係可能求其搵個商場行吓,行到悶就求其搵套戲睇吓(如果唔係啲票房點會咁易刷),肚餓就求其在商場搵間連鎖餐廳食個飯,咁就完場。彼氏真係好厭倦呢種見面模式了⋯⋯

 

第二,諗唔到食乜。一諗晚飯要食乜就好不安!想食好少少,埋單都要五六舊水。好喇,想頹頹地食啲簡單野其實都冇乜得揀,到最後都係入咗三哥,想冇咁頹就加碟皮蛋同大土匪就當食大餐。再唔係就跟個啲乜鬼假期搵下個啲隱世伏店,試完又一Day。

 

唉,其實彼氏最嚮往嘅拍拖模式,就係可以兩個人喺屋企睇吓戲,打吓機,煮吓飯仔咁。可惜彼氏彼女都冇父幹,都係要面對土地問題,咁就唯有留啲錢去多兩次旅行開心吓就算。

 

喺香港地拍拖真係好艱辛 :(

 

P.S. 彼氏近來買咗部Switch,聲稱可以拎出街同彼女玩,不過玩咗幾次之後就梗係獨霸咗部機啦,嘻!

【彼氏點睇-拍拖去邊好】

 

彼氏

七月二十日

彼氏 彼女 A Couple of Stories

彼氏 = 男友,彼女 = 女友

這是關於一對情侶的相處逸事

A Couple of Stories:一段經歷,兩種視角

COPYRIGHT 2019 ©ALLGIRLSHK. ALL RIGHTS RESERVED