彼女好鍾意好鍾意好鍾意黐住彼氏，唔係普通成日想要見嗰種，而係堅．黐身嗰種。

 

放假喺屋企嘅時候，除咗沖涼、去廁所，其餘可以黐住彼氏嘅時間，彼女都唔會比彼氏離開半步；出街拖住係基本啦！一有機會，彼女就會攬住彼氏，仲會扭錫～ 好正常嘅事，彼氏竟然投訴！

 

明明彼氏自己都會間中攬吓彼女腰，或者搭吓膊頭，呢啲基本嘅身體接觸唔係同錫錫一樣咩？都係情侶間會做嘅事啊！平時都已經唔係成日見到面，見到面梗係唔可以錯過任何一個可以黐住彼氏嘅機會啦～

 

記得最嬲嘅一次，係除夕同彼氏班兄弟出去倒數，倒數完梗係要啜返啖㗎啦，彼氏竟然話「唔好啦，啲兄弟喺度望住啊……」嗰刻我真係嬲到爆炸﹗心諗「乜我好失禮你啲朋友咩﹗」

 

就算唔係同佢D朋友出去，彼氏都係鍾意拒絕彼女！「多人啊」係彼氏嘅標準答案。

每次比彼氏拒絕，彼女都心有不甘！點解要在意其他人點睇喎，佢哋喺街做咩我都唔會理㗎，因為每個人都有自由吖嘛！至少彼女係咁諗。

 

所以一聽到彼氏講「多人啊」，彼女都依然會繼續扭計，扭到成功為止！

因為彼女真係諗極都諗唔明，黐實鍾意嘅人有咩問題！

 

P.S. 話唔定彼女前世係樹熊，彼氏係樹

​

​