作為一個小毒毒,彼氏真係覺得係公眾場所同彼女親熱真係好尷尬。

 

未同彼女拍拖之前,我真係唔會喺條街同人親熱。就算係自己一個搭地鐵,都好怕見到啲情侶係度親熱,有啲誇張到喺地鐵車廂攬埋一舊打茄輪都夠膽死,望到我起晒雞皮。我心諗「大佬呀,唔係個個都想見到你地脷疊脷嫁,返屋企先慢慢搞啦。」

 

不過,真係估唔到呢啲事情竟然都會發生喺自己身上!彼女都算係一個十分喜愛親熱嘅女人,每次上親扶手電梯,都會對住我做個嘟咀表情,潛台詞係「BB,我哋啜啜﹗」上到地鐵又係,明明架車已經迫到死,都係要嘟起個咀扭我錫。成個地鐵站同車廂都幾乎人貼人咁濟,喺咁嘅情況下親熱真係好似做show比側邊啲人睇咁,彼氏作為小毒毒,喺咀個刻就會覺得全世界喺到睥緊我哋,真係好鬼尷尬。

 

記得有一次彼氏獲邀請上彼女屋企食飯,上到去佢居然可以當屋企冇人咁樣攬住我,又洗出招牌嘟咀扭錫,我細細聲同佢講「唔好啦,你媽咪同細妹會望到㗎。」於是彼女就嬲咗我。

 

唉,有時我都明白女仔係鍾意比人錫同埋黐住個男朋友,咁先有安全感㗎嘛。所以彼氏都有配合彼女嘅心態,有時唔係咁多人都會主動啲錫下佢啦。可能真係因為香港咁鬼迫,人咁多,先至搞到彼氏覺得喺街親熱先咁尷尬,唯有再慢慢適應下啦……

 

P.S. 彼氏真係唔想有一日比人公開真面目擺上網呀……

【彼氏拒絕:糖黐豆】

彼氏

十月八日

彼氏 彼女 A Couple of Stories

彼氏 = 男友,彼女 = 女友

這是關於一對情侶的相處逸事

A Couple of Stories:一段經歷,兩種視角

COPYRIGHT 2019 ©ALLGIRLSHK. ALL RIGHTS RESERVED