【彼女點睇－前度】

成日心思思想知道，究竟喺彼氏心目中係自己好啲定係佢個 Ex 好啲。

 

明知答案可能唔啱聽，但就係想知，比較吓究竟佢以前同 Ex 開心啲，定係同我一齊開心啲。

 

所以，無論係去邊食飯或者拍拖，都好自然會問彼氏：「你同 Ex 有無嚟過呢度啊？」、「你個 Ex 有無做過啲咩係令你好難忘㗎？」、「你同 Ex 有無諗過結婚啊？」⋯⋯

十次問完十次都會唔開心，因為彼氏仲輕鬆講得出同 Ex 去過邊、Ex 對佢幾好。

 

邊有女人接受到另一半對於前度仲可以有咁深刻嘅記憶？於是，我決定要做返啲嘢：

首先，唔再主動提起任何有關彼氏 Ex 嘅事情，減少佢回味過去嘅機會。

然後，努力咁創造比彼氏過去更美好嘅回憶，屬於我哋兩個嘅回憶。

 

當然，間中都要考考彼氏，檢驗吓計劃嘅成效啦。

記得有一次，彼氏買咗外賣比 OT 嘅彼女，好有偵探頭腦嘅彼女一睇就認得呢間餐廳，係彼氏同 Ex 食過嘅（彼氏自己喺 IG 講過），立即放隻蕉皮跣吓彼氏：「好好味啊呢隻熱狗，你以前食過？」

 

彼氏竟然話冇！

 

真係火都嚟，九秒九搵返張相出嚟同佢對質！

點知彼氏真係一臉無辜咁話：「唔睇返張相我真係唔記得啊！饒命啊大人！」

 

GOOD！呢個結果真係令彼女非常滿意，因為慢慢地，彼氏真係開始唔記得以前發生過啲咩事，我就知道我嘅洗腦計劃係成功嘅！

 

不過「 我同你個 Ex 邊個好啲？」呢條問題都係要繼續問，點解？

其實都係想聽佢講句「 傻豬， 梗係你最好啦：) 」

 

P.S. 無幾耐之前彼氏 Cap 咗圖畀彼女睇，見到乜火都無哂～