彼氏作為一個小毒毒，身邊嘅朋友稱唔上好多，感情最好嘅就係一班相識多年嘅兄弟。對於男友嘅所謂兄弟，女人總係有啲戒心，成班麻甩佬圍埋一齊，唔方會有好事發生！

 

以往彼女對於「兄弟」都幾反感，因為聽返嚟好多故事都係畀兄弟帶壞，例如之前網上流傳一單男友夾埋兄弟瞞住女友們去柬國𨂽邪骨嘅案件咁，兄弟就係會教壞人然後仲要一齊夾口供試圖隱瞞！係咪好可疑先？

 

而彼氏嘅兄弟幫每個星期都硬係要約出嚟，有時仲見得密過彼氏同彼女！次次食完飯硬係要去飲酒吹水，明明第二朝要返工都唔願返屋企！有無咁多口水㗎？

 

疑心重嘅彼女終於有一日忍唔住開口問彼氏：「成日同班兄弟密密斟，係咪圍埋一齊講衰嘢！」下一秒準備拎起把刀之際，彼氏竟然乖乖交出電話，「你自己睇喇」。彼女當下呆咗，好認真咁諗究竟彼氏係真係無嘢收收埋埋吖，抑或只係想拋吓彼女。同時彼女已經冧咗，明白到彼氏係會為咗彼女，供出兄弟，即使兄弟之間有女人唔可以知道嘅秘密！

 

Anyway，彼女無拎到嚟睇，選擇咗相信彼氏。因為後尾班兄弟見又見過，平日講起啲無聊嘢、搞笑嘢，彼氏都會開心 Share 埋比彼女睇～ 信任就係咁樣建立返嚟，彼女都好鍾意呢種感覺，希望彼氏唔係真係拋我㗎啦～

 

P.S. 咁當然彼氏同班兄弟出去 Happy 都要比證據啦，唔係真係諗住彼女會無條件信佢吖嘛？